भद्रपुर सरोकार समाज काठमाडौँले आफ्नो दोस्रो वार्षिक साधारण सभा तथा भद्रपुरे भेटघाट कार्यक्रम यही २०८१ साल असोज १७ गते घटस्थापनाको दिन सम्पन्न गरेको छ। कार्यक्रममा सङ्घीय सांसद, पूर्व उपप्रधानमन्त्री तथा राष्ट्रिय प्रजातन्त्र पार्टीका अध्यक्ष माननीय राजेन्द्र लिङदेन तथा सङ्घीय सांसद एवं नेपाली कांग्रेसका महामन्त्री माननीय विश्वप्रकाश शर्माको गरिमामय उपस्थिति रहेको थियो। कार्यक्रममा बोल्दै माननीय राजेन्द्र लिंगदेनले हालै आएको घनघोर वर्षा र बाढी पहिरो आदिको कारणबाट भएको ठूलो क्षतिमा भद्रपुरहरूले उदार मनले सहयोग गर्ने विश्वास गर्नुभयो। भद्रपुर सरोकार समाज काठमाडौँले भद्रपुरबाट काठमाडौँ आई बसोबास गर्नुहुने⁸ विभिन्न पेशा व्यवसाय वा अन्य उद्यम गरी बस्नुहुने महानुभावहरुलाई सम्पर्कसेतुमा जोडेर भाइचारा अभिवृद्धि गर्न ठूलो भूमिका खेलेको उहाँले बताउनुभयो। नेपालको एउटा पुरानो नगरपालिकाको हैसियतले भद्रपुर नगरपालिकाले आफूलाई सदैव उँचो राख्नुपर्ने उहाँको विचार थियो। 

त्यसैगरी माननीय विश्वप्रकाश शर्माले आज यस समारोहमा आफूसँगै मेची क्याम्पस भद्रपुरमा सँगै पढेका मित्रहरू, आफूभन्दा अग्रज व्याचका दाजुभाइ दिदीबहिनीहरु र आफू पछिका भाइबहिनीहरू समेत एकै ठाउँमा भेट्दा नोस्टलजिक अनुभूति भएको व्यक्त गर्दै गर्नुभयो, "मानिसहरू फैलिएर जतासुकै पुगे तापनि जरा त आफ्नै भूमिमा हुन्छ। र त्यही जरा गाडिएको माटोको माया र प्रेमले यस्ता भद्रपुर सरोकार समाज जस्ता संस्थाहरु जन्मने गर्छन् र त्यो प्रतिको सद्भाव र प्रेम वृद्धि हुने गर्दछ भन्ने मेरो विश्वास रहेको छ ।"

मलाई विश्व प्रकाश बनाउने भद्रपुरको मेची क्याम्पस मैले जिन्दगीमा पहिलोपटक आफ्नो पिताजीको हातबाट टिका लगाएको भद्रपुरको मेची कारावास, प्लेन चढेको भद्रपुर एयरपोर्ट, रङ्गशाला देखेको मेची रङ्गशाला भद्रपुर, यी सबैसँग मेरो जिन्दगीका अनुभूतिहरु हाँसिएका छन्। संवेदनाहरू गाँसिएका छन्। त्यसैले भद्रपुर मेरो लागि एक विशिष्ट भूमि मात्र होइन जीवनको एक विशिष्ट पाटो पनि हो। भद्रपुर सरोकार समाजले हाम्रो भद्रपुर नामक जुन पुस्तक प्रकाशन गरेको छ, मैले पूरै पढिसकेको त छैन तर त्यहाँ भद्रपुरको भावी विकास उन्नति र समृद्धिका लागि महत्वपूर्ण विचारहरु र कार्यपत्रहरू प्रस्तुत गरिएको पाएँ। म र राजेन्द्र लिङ्देनजी जस्ता राजनीतिकर्मीको लागि यो एउटा महत्वपूर्ण दस्तावेज हुनसक्छ। तपाईँहरूको यो प्रयासलाई म हृदयदेखि नै धन्यवाद दिन चाहन्छु। उहाँले मुलुकको वर्तमान आर्थिक अवस्थाको चित्रण गर्दै भद्रपुर लगायत सम्पूर्ण मुलुकको विकासको लागि आफूले गर्न सक्ने प्रयासहरूको बारेमा बताउनुभयो

कानुन आयोगका उपाध्यक्ष प्राध्यापक डाक्टर लक्ष्मीप्रसाद मैनालीले माननीय सांसदहरु समक्ष संसदमा कानुन आयोगको सन्दर्भमा उठाउनुपर्ने विषयवस्तुहरूको बारेमा अवगत गराउनु भयो।
भद्रपुर सरोकार समाज काठमाडौँका अध्यक्ष श्री झलेन्द्र भट्टराईले उपस्थित सम्पूर्ण उपस्थित मान्यगण, अतिथिगाण एवं सदस्य र पदाधिकारीज्यूहरूलाई स्वागत अभिवादन गर्दै समाजका हालसम्मका गतिविधि एवम् समाजका उद्देश्य र भावी योजनाहरूको बारेमा प्रष्ट पार्नुभयो। उहाँले भद्रपुर सरोकार समाजले गत वर्ष हाम्रो भद्रपुर नामक पुस्तक प्रकाशन गरेको र यसमा संग्रहणीय एवं पठनीय धेरै विषयवस्तु समावेश गरिएको जानकारी गराउनुभयो । आज उद्घाटन गरिएको भद्रपुर सरोकार समाज काठमाडौँको वेबसाइटमा भद्रपुर नगरपालिकाका आर्थिक, सामाजिक, राजनैतिक, शैक्षिक, सांस्कृतिक, पुरातात्विक लगायतका सम्पूर्ण विषयवस्तुहरुलाई प्रकाशन गर्दै एक पठनीय र विश्वासनीय स्रोतको रुपमा स्थापित गर्ने बताउनुभयो । चाँडै नै भद्रपुरका विविध पक्षहरूलाई दृश्य रुपमा उतार्न भद्रपुर नगरपालिकाका विद्यार्थी भाइबहिनीहरूको सृजनशीलतालाई प्रयोग गरेर दृश्य सामग्रीहरू उत्पादन गर्ने प्रतिस्पर्धा आयोजना गरिने समेत उहाँले जानकारी गराउनुभयो । 

कार्यक्रममा सम्बोधन गर्दै नेपाल सरकारका सहसचिव श्री गोपी कृष्ण कोइरालाले भद्रपुर सरोकार समाजको पृष्ठभूमि उल्लेख गर्दै यो पृथ्वीनगर सेवा समाज २०६० सालमा स्थापना भएसँग जोड्नुपर्ने उल्लेख गर्नुभयो । भद्रपुर सरोकार समाज को २०७४ सालमा औपचारिक रुपमा गठन हुनुपूर्व नै यसको स्थापनाको जग निर्माण भएको उहाँले प्रष्ट पार्नुभयो। 

कार्यक्रममा समाजका निवर्तमान अध्यक्ष श्री वेदनिधि निरालाले भद्रपुर सरोकार समाज स्थापनाको इतिहास उल्लेख गर्दै यसलाई अझ समृद्ध बलियो र सम्पूर्ण भद्रपुर बासीहरूको एकता र प्रेमको केन्द्रको रुपमा विकास गर्न आह्वान गर्नुभयो।

कार्यक्रममा समाजका महासचिव श्री अशोक पाण्डेले समाजको वार्षिक प्रतिवेदन तथा आयव्यय विवरण प्रस्तुत गर्नुभएको थियो। साथै महासचिव श्री पाण्डेले साधारण सभाका प्रस्तावहरू सभामा प्रस्तुत गर्दा सम्पूर्ण प्रस्तावहरू सर्वसम्मतिबाट पारित भएको थियो। साधारण सभाको कार्यक्रम समाजका कार्यसमिति सदस्य कमला खनालले सञ्चालन गर्नुभएको थियो भने सम्पूर्ण अतिथिगण एवं उपस्थित महानुभावहरूलाई समाजका उपाध्यक्ष इन्जिनियर श्री सुशील भट्टराईले धन्यवाद ज्ञापन गर्नुभएको थियो। 

कार्यक्रम व्यवस्थापनमा श्री भूमिका भण्डारी एवं होम सुवेदीले महत्वपूर्ण भूमिका खेल्नुभएको थियो।